ألوهـــــــــــــــــــــــــــــــــــا ( بلغة أهل هاواي والبكيني والناس الي بتشلني وبتبكيني )
خلونا نتفق قبل ما أعرَف عن نفسي ومكنونات يومياتي عالية السعرات والي هتشرح أو هتفضح - أيهما أقرب - نمطي الغذائي وحربي على الوزن الزايد ، وهتوضح قصة ارتدادي الغير إرادي لحزب " التلاجة الإيديال " الي نازلة صاب من غير تقسيمة ، إنما إيه " شربااااااااااااااااااااااااتة ، مش موضوعنا خالص دولقت ، هنتفق على بنود بتنظم يومياتي معاكو وثقتي إلي ملهاش داعي فيكو ،،
* بنود الإتفاق :
1- يمنع منعاً باتاً على كل واحد أو واحدة سمبتيك بمعنى أدق خشبة وملهمش في الوزن التقيل يقرا أو تقرا مذكراتي ، فيه صوت قميء هيستفسر : طب ليه ؟ ، هقوله : كيفي ، حد ليه شوق في حاجة يا عم راغب علامة ؟
2- يمنع أي حد يوصل اقتباس أو مقاطع أو عبارات من اليوميات دي لماما ، حد تاني عامل نفسه ليه في العلم وبيحب يسأل ويتعلم هيقول : لماذا ؟ هقوله : غور ياد ، عايزة أفضفض عن نفسي وأقول الي في نفسي ، افرض ( غولوطت ) حبتين وتكلمت عن قسوة ماما عليا أقوم أخسر أنا الست الوالدة علشان حد فتان وأهبل ؟
3- واحد مش هيسأل مجرد هيفكر بصوت عالي وهيقول : ينفع من وحي اليوميات دي ، آخد عبرة وعظة وأطبق قصة النجاح - الي مش هتكون فيها - وعلى نهجها أرسم خطة لتحرير فلسطين !
نهار أسود
هي قصة كفاحي بقت اليومين دول بتحرر فلسطين !! طب كنتوا ساكتين عليا طول السنين دي ليه طا !
4- يؤجل حتى الإستدلال عليه
ولحد ما أستدل على بقية بنود الإتفاق ، كلكم عرفتوا الهدف من الكلام الي بيجيب الصداع ده ، أكيد تأريخ لفترة عمرية وإنسانية غاية في الأهمية إسمها (( أنا كلبوظة )) ،
يلا ،، كل واحد يجيب حبتين السيبوتيرم أو الأورلي أو الشيتوكال بتوعه معاه ، ولو حد ملهوش في الكيف مسموحله يجيب تشيز كيك أو باكو بسكويت نواعم أبو نص جنيه ، ويلحقني ، وربنا يقدرني وأوصل لحل مع وزني الزايد ، وانتوا بعون الله هتفضلوا زي ما انتوا ، أو أتخن ..........
* ويا بخت من لبس الجينيز ، وقال مقاسي 36
ليست هناك تعليقات:
إرسال تعليق