ساكوسي يا جماعة ( 7 لغات والبخت مات )
حلوين ولزاز مع بعض ولسه بنواصل كلامنا عن الوزن والدايت وشكاوينا التي آن لأبواب السماء أن تفتح لها ، فيرفع الظلم من الأرض ، ونبطل ريجيم ، البشرية كلها تبطل يعني ، مش ناس وناس ، التعاون في النقطة دي مهم أوي والله ،
قبل ما نتكلم عن أشهر 7 كدبات بنكدبها واحنا مضطرين علشان نبرر وزننا الطبيعي الزايد حبتين خليني أفسر نظرية المؤامرة الرهيبة التي تحاك ضد كل كلبوظ وكلبوظة فيكو ( على أساس إني ماريا شاربوفا يعني ) ، ما علينا ، فلو فرضنا إنه البشرية جمعاء متقسمة ل تلات تصنيفات من حيث الوزن ، هنلاقي حد كلبوظ ، حد ربنا يهده وزنه " يفرس " وليه كيان ، وشوية كده ملهومش لزمة والنعمة مش بتبان عليهم ودول نقدر نصنفهم ك كم مهمل ،
قوم إنت بقى لما تيجي تزنق نفسك وسط أي مجموعة فيهم ، تختار مين ؟ فئة بسم الله ما شاء الله الدموية بتنط من وشهم وايديهم وحتت كده ما زال حيائي يمنعني أقولها ؟ ولا تقوم جاي حاشر نفسك مع أجسام مفيهاش غلطة وليها كيان - مع مراعاة إنه كل كيان اتخلق على وش البسيطة دوماً كيان ظالم وغاشم ومستعمر -؟ ولا تقوم جاي متسكرد ذاتك وعقدك فاضحاك وتيجي في الكم المهمل وتتصدر ؟
هاااااااااااااااااااااااااااااااااا ، أنهي فيهم الي بيحفظ كرامتك كإنسان ليه مشاعر وأحاسيس وشوية كلاكيع كده فوق بعضيها ؟ أنا مش هرد ، هسيب كل واحد لضميره .
التصنيف والمؤامرة والكلام الجامد بقى في إيد كل واحد أهه ،وبكده أرجع أكدب قصدي أفضح كم كدبة كده بيمر بيها كل محتاج ومزنوق علشان يبرر حالة هي من الأساس ، صحية إنسانية بحتة ، فلة متضرش ومتعرش !
أول كدبة :
1 - مبكلشي " ! "
طيب أنا مش هقول رايي الشخصي وأحط أقواس وفواصل ، بس حد عاقل غيري يشرحلي ، أمال أكوام اللحم المتستفة فوق بعضيها دي إيه ؟ ورم ؟ غلطة ؟ خطيئة بدل ما نعمل زي بنوكيو ونتعاقب عليها ومناخيرنا تطول نقوم نعرض مثلاً ؟ والنبي يا جماعة ، وحياة كل لحظة حلوة عشناها ولسه هنعيشها إن شاء الله مع حلة الرز وصنية الكنافة ، بلاش الكدبة دي ، أصلها تكسف أوي ،
2- شكلي هيبقى وحش أوي لو خسيت
يعني هي أشكالنا كده متخضش ؟ يعني هو العقل السليم الي في الجسم السليم والمحترم والصحي مش حاجة حلوة برضه ولا إيه ؟
3 - أنا وزني وراثة
4 - أنا ما بنزلش على الريجيم
واحد هييجي يسأل لضمتي زيد في عبيد ليه ؟ هرد : أصل أولى مباديء الرياضة البحتة بتقول : احسر جسمك ، يتحسر يخس ، لا تقولولي وراثة بقى ولا دايت مش نافع ولا الكلام الفاضي ده كله ، ويا ريت نبطل نكدب الكدبة ونصدقها ، أصل الواحد مش ناقص يعني ، هيبقى تخن وهم وعته كمان !
5- .............. ، 6-............... ، 7-................، " لاعتبارات ديموقراطية بحتة ولظروف الاستفتاء والانتخابات وجو الاشتغالات السائد اليومين دول ، هسيبلكو مجال تشاركونا فيها بأهم 3 كدبات غير المذكورين أعلاه الي بتداروا بيها سبب القوام المصبوب أو المعيوب - أيهما أصح - ، يمكن نستفاد كلنا بكدبة جديدة مش مستهلكة نخرس بيها أي عين بتغمز أو لسان بيهمز "
الدنيا ليل ، والجو برد ، والجوع آثم ،والوحدة قاتلة ، بقولكو ايه : ما تيجو نعك ؟
